WILLEMSTAD – Loke Kòrsou no ta logra, Mexico si ta logra: un regreso na kategoria 1 di FAA. Esei luchtvaartnieuws.nl  ta informá.

Mexico tin adelanto grandi pa haña e klasifikashon di seguridat bèk serka Federal Aviation Administration Merikano, FAA. Esaki nan a anunsiá djabièrnè. Pero, kontrali na loke gobièrnu di Mexico a bisa, e státus renobá no ta na vigor ainda.

FAA a pone Mexico den luna di mei 2021 riba un lista di paisnan ku ménos seguridat, pasobra no tabata regulá e kompanianan di aviashon den e pais ‘konforme e normanan mínimo di seguridat internashonal’.

For di e tempu ei Mexico a traha duru pa haña e státus mas haltu ei bèk. Ministerio  di Asuntunan Eksterior di Siudat di Mexico a bisa na komienso di e siman aki ku Estados Unido a duna aprobashon kaba na Kategoria 1 renobá pa e pais, pero FAA a korihí esaki djabièrnè. Segun e outoridat aéreo Merikano nan no a yega asina leu ainda.

Segun nan propio deklarashon Mexico ta finalisá un plan di akshon pa seguridat den aviashon na luna di dezèmber. Despues FAA lo bishitá e pais na luna di yanüari 2023 i e ora ei lo fiha e fecha definitivo pa duna e státus di Kategoria 1 bèk.

Na komienso di 2012 e outoridat Merikano di aviashon, FAA, a husga ku Kòrsou no ta kumpli ku tur rekisito internashonal riba tereno di seguridat aéreo. P’esei a degradá e sektor aéreo di kategoria di seguridat unu pa dos. Konsekuensia di esaki ta ku kompanianan di aviashon lokal no por ehekutá buelonan pa Estados Unido ku nan propio avion. 

Te ku awor ta parse ku sèn i konosementu ta stroba un regreso rápido pa Kòrsou pa e státus tan anhelá di FAA.