WILLEMSTAD – Mañan, 5 di novèmber,  Museo Mongui Maduro ta bende na Landuis Rooi Catootje un parti di su kolekshon ku tin den depósito di e museo. Un siman despues riba 12 di novèmber públiko tin un chèns mas.

Ta trata di artíkulonan for di e kolekshon di famia Maduro, manera muebel, artíkulonan di kristal i porselana. Pero tambe artíkulonan manera un kas di pòpchi i bakinan di mata.

E muebelnan di e kolekshon ta konsistí di muebel di ofisina klásiko di añanan sesenta di siglo pasá, un sèt di kamber di alrededor di 1920, muebel di kurá i kashinan di paña di mei mei di siglo pasá.

Interesant ta un seri di tayó ku imahen di monumentunan di Kòrsou ku Stichting Monumentenzorg a yega di emití den pasado.

Mañan lo tin tambe un marshe di buki, kaminda Mongui Maduro Library ta bai bende bukinan ku tin dòbel den su kolekshon.

Ta usa e rendimentu di e benta pa desaroyá un bishita ku guia interaktivo na e museo pa mucha i hóben pero tambe pa restourá algun muebel antik.