WILLEMSTAD – Den e último dos simannan a prosesá mas ku 14.000 balotashon di impuesto di kua 5.000 a bini na remarke pa resitushon. Servisio di impuesto a duna alrededor di 6.5 mion florin bèk na e pagadó di impuesto.

Ta trata spesialmente di Impuesto di Entrada. Banda di esei a restituí tambe AOVZ, AVBZ i BVZZ. Na momentu di restituí ta wak promé ku si tin debenan habrí manera impuesto di sushi, impuesto di inmobil i/òf lo demas. Den algun kaso e montante final ku ta yega riba kuenta di banko por ta ménos ku a spera. 

Na e momentunan aki tin kasi 1.100 papel di impuesto ku un balor di 1.6 mion florin ku no a paga,  pasobra datonan di kuenta di banko di e pagadó di impuesto no ta konosí na Servisio di Impuesto.  E pagadó di impuesto lo risibí un karta via pòst i lo mester yama Servisio di Impuesto e mes.

Den dianan benidero Servisio di Impuesto lo sigui paga restitushon. E markadó  di e kantidat di deklarashon di impuesto ta pará awor na kasi 17.000. Lo imponé nan entre awor i yanüari 2023. Ochenta porshento ta bai via di un sistema outomatisá.