WILLEMSTAD – Awe mèrdia den kareda di 12’or ta pone e plataforma Seven Brasil ku ta den Caracasbaai riba un otro barku. E operashon ta bai dura algun dia, asina e kontroladó di haf di CPA ta informá.

E barku Hua Rui Long, ku ta un barku di karga spesial pa karga sumamente pisá i  ku ta nabegá bou di bandera Chines, ta hiba e plataforma Singapore.

E tarea di un barku asina ta pa bai parsialmente bou di awa i asina toubotnan por duna asistensia pa pone e plataforma riba e dèk.

Mester na tur seis toubot i kuater barku ku ta nabegá bou di guia di lotsnan di CPA i ku Kapitan di haf di Kòrsou ta dirigí.

Ta pidi personanan ku ta landa, deportista akuátiko i otro botonan pa tene sufisiente distansia for di e barkunan kaminda e operashon ta tumando lugá.