WILLEMSTAD- E aerolínea Colombiana Sarpa ta bai stòp ku su buelonan bi-semanal entre Medellín na provincia Antioquia i Kòrsou. 

E último buelo lo wòrdu ehekutá dia 6 di yanüari 2023. E aerolínea ta sita kambionan den merkado i tambe devaluashon di e peso Kolombiano komo e faktornan ku a kondusí na e desishon aki. 

Despues ku Sarpa ta stòp di bula, ta keda e kompanianan EZ Air i JetAir Caribbean ku ta sigui bula buelonan stret entre Kòrsou i Medellín. Den nan dos ta EZ Air so ta ofresé konekshon for di i pa Boneiru riba un solo pasashi. 

Entusiasmo

Aunke Sarpa aña pasá a kuminsá ku hopi entusiasmo ku ehekushon di buelonan ámbos na Kolombia mes i pa Aruba i Kòrsou, nan mester a retirá relativamente rápido ku buelonan nashonal dor di un kompetensia fuerte ku primeramente Wingo i Viva Air Colombia. Awor aki tambe ta bin kanselashon di e buelonan pa Kòrsou riba dje.