WILLEMSTAD – Despues di fayesimentu di e eskritor Diana Lebacs a saka dos buki mas di dje, unu pa mucha i unu pa adulto. Ta trata di un novela  ‘Dame van de Avond en het Berouw van Benaro’ publiká pa empresa editorial Knipscheer i e promé buki di prenchi Karibense na kuater idioma pa mucha, ‘Pasenshi’ ku ta bai tokante e porko Pasenshi.

Diana su último deseo tabata pa publiká Pasenshi i parti’é bou di hubentut. Maria van Veen i Laurindo Andrea ku ta presidente di Stichting Kindereducatie Curaçao a priminti’é ku esei lo sosodé, asina nan a bisa Caribisch netwerk.

Via donashonnan nan a haña djes mil euro i por a manda paketenan di 25 buki pa tur skol básiko, skol spesial i bibliotekanan. Anto ainda a sobra sèn pa lansa e buki pa hubentut aki fin di òktober ku un fiesta di mucha spektakular.

‘Pasenshi’ ta papia di pasenshi, asina Andrea ta bisa. E mésun pasenshi ku Lebacs mester tabatin ora e tabata sa ku e ta bai muri, e pasenshi pa laga lòs, entregá bo asuntunan na otro i entregá bo mes. 

Pa loke ta trata ‘Dame van de Avond en het Berouw van Benaro’  e tendensia ta grandi, segun Andrea, pa buska un delaster mensahe di Lebacs na Kòrsou i mundu henter.

Lebacs a skirbi 45 buki, pa tur edat. Dos biaha el a kai den premio. Na 1976 el a haña, komo promé persona no-Europeo, un Zilveren Griffel pa su buki pa hóben ‘Nancho van Bonaire’ i na 2003 el a haña e Premio kultural di Prins Bernhard Cultuurfonds Nederlandse Antillen en Aruba voor Jeugdliteratuur.