KRALENDIJK- Segun miembro di Konseho Insular (KI), Daisy Coffie gobiènu di Boneiru ta skondiendo tras di e organisashon STINAPA, ora ta trata di e problemátika di molèster di awa riba nos isla, despues di un temporada di hopi yobida. 

“E situashon di awa ku a yena lugá i keda para no tin nada di aber ku STINAPA sino simplemente ta konsekuensia di falta di maneho di mantenshon di infrastruktura di parti di gobièrnu. Falta di mantenshon  di  “afvoernan”, falta di mantenshon di roi i riolnan, falta di mantenshon di dam i tankinan”, asina Coffie ta trese dilanti. 

Tambe segun Coffie, por kulpa un falta di maneho pa krea plan di parselashon i di duna pèrmit di konstrukshon sin tene kuenta ku deshecho di awa (afwatering). “Ta konosí ku nos infrastruktura no ta traha pa akapará ni deshasí hopi awa i ta bini aserka ku hopi “afvoer” tabata será pa motibu di falta di mantenshon; por mira kla kon yerba i tera/lodo a será esakinan i stroba pasashi di awa”.

Infrastruktura

Coffie ta di akuerdo ku STINAPA, ora esakinan a deklará nan no tin nada di aber ku infrastruktura. Segun Coffie, STINAPA no tin ningun outoridat pa por òf duna òrdu pa será ningun “afvoer”. Awor nos ta mira kon gobièrnu ta kibra kaminda pa limpia “afvoernan” ku tin tempu sin mantenshon i ku ta tur será ku lodo i vários otro tipo di material. 

E loke a sosodé ta un bon momento pa nos gobièrnu  a aserká gobièrnu Hulandes i deklará Boneiru komo un aria di kalamidat. Ku e konosementu awor ku awa a kai, ingenieronan di tur disiplina lo por a bin huntu i diseñá un plan pa enfrentá e futuro ku a konsekuensia di kambio di klima lo tin mas sorpresa pa nos. Ban traha dam warda pa  awa i no tira falta riba ningun hende o instansia, sino diputado di infrastruktura i gobièrnu.