WILLEMSTAD – Un grupo di ekspertonan finansiero di Kòrsou tabata na Sürnam riba un mishon komersial. Esei tabata den koperashon ku Vereniging Surinaams Bedrijfsleven bou di e nòmber Suriname Insight 2022.

E delegashon di Kòrsou tabata konsistí di 25 miembro. Tin hopi interes di Kòrsou pa desaroyonan na Sürnam pa motibu di e perspektiva ku e pais ta bai pasa den desaroyonan ekonómiko grandi.

E mundu komersial di Kòrsou ta investigando awor e posibilidatnan pa kontribuí na e perspektivanan di  kresementu, spesialmente riba tereno di invershon, finansiamentu, lantamentu di empresanan kombiná i ofresé tur sorto di servisio pa tur sektor di e ekonomia Sürnam.

Den e kuadro aki representantenan di diferente sektor na Sürnam a tene presentashonnan, manera representantenan di sektor di transporte Sürnam, turismo, sektor minero i finansiero, kaminda a informá e delegashon di Kòrsou riba e situashon den e sektor i e posibilidatnan.