WILLEMSTAD – E barku di marina Hulandes, De Holland, a interseptá fin di luna pasá dos transporte di droga den laman Karibe ku ta 900 kilo na tur.

Ta un avion di patruya marítimo Merikano a diskubrí e promé asina yamá ‘go fast’ i e ora ei De Holland a drenta den akshon. E helikòpter di US Coast Guard ku ta stashoná riba e barku di marina Hulandes i e botonan rápido FRISC (fast raiding interception and special forces craft) a logra alkansá e ‘go fast’, ku tabatin mas ku 500 kilo di droga na bordo.

E di dos lote di droga ku a interseptá tabata 400 kilo di kokaina. A tuma tur pakete den beslag i a detené e kontrabandistanan sospechoso ku tabata riba e ‘go fast’.

A entregá e sospechosonan i e droganan despues na e barku di Wardakosta Merikano pa persekushon den Estados Unido.

For di òktober 2022 De Holland ta aktivo komo barku stashoná den regio Karibense i ta sostené Wardakosta Karibense.