WILLEMSTAD – Na òktober Kòrsou a pasa e límite di 400.000 ku e kantidat di turista ku a bini e isla. Ku dos luna ainda pa bai den 2022, Curaçao Tourist Board, CTB, ta pensa ku nan ta yega un kantidat rèkòrt di yegada di turistanan ku ta pasa anochi.

Luna di òktober a produsí kasi 45.000 bishitante pa Kòrsou. Ku e yegadanan aki òktober ta e di dos mihó luna di aña 2022. E luna ku a presta mihó te ku awor tabata yüli, ora ku mas ku 48.000 bishitante, ku ta keda pasa anochi, a bini Kòrsou.

Hulanda, Estados Unido di Merka i Colombia ta bon pa 71 porshento di tur turista ku a biaha pa Kòrsou den òktober i ku ta keda mas ku un anochi. E proporshon entre e tres paisnan aki ta respektivamente 44,8, 20,4 i 5,8 porshento.

Na tur 63 porshento di tur bishitante ku a biaha pa Kòrsou a skohe un risòrt komo tipo di akomodashon i 37 porshento a keda den akomodashonnan alternativo. CTB a registrá na òktober un averahe di estadia di 8,6 anochi.

Norteamérika

E region norteamerikano a trese Kòrsou un total di mas ku 10.000 bishitante, ku ta kasi 24 porshento di tur yegada. For di Estados Unido a bini 9.000 bishitante. Esei tabata na òktober 2019 algu mas ku 4.000,  pues awor mas ku dòbel.

Maske  e demanda grandi for di merkado Merikano ta kontinuá, CTB ta kontentu tambe ku e prestashonnan positivo di merkado Kanades, awor ku tantu Air Canada, komo WestJet a reanudá e buelonan pa Kòrsou. Na tur a yama 1.500 bishitante Kanades bonbiní, mientras ku na òktober 2019 e kantidat no tabata yega ni 900.

Suramérika i sobrá 

For di e region di Suramérika a bini kasi 6.000 bishitante, di kua 2.600 a bini di Colombia i 900 di Brasil. Den e aña promé ku Corona Colombia a trese algu mas ku 2.100 bishitante.

For di region Karibense mas ku 3.000 turista, ku ta keda drumi, a bini Kòrsou den òktober. Nan tabata bini prinsipalmente for di e otro islanan di Reino.

Na òktober tabatin 14 barku krusero, ku huntu a trese kasi 37.000 bishitante Kòrsou.