KRALENDIJK- Bonaire International Airport (BIA) ta instalando bòrchi nobo na aeropuerto pa krea mas klaridat pa loke ta outomobilistanan ku ta bishitá aeropuerto. 

BIA ta nota ku hopi hende ta usando e asina yamá Kiss & Ride komo un lugá pa stashoná nan outo, strobando otro outomobilista ku ke djies pasa baha pasahero òf pasa wak pasahero ku a kaba di yega. 

“Nos a nota ku ainda tin hopi konfushon serka outmobilista, pero nos ta kere ku bòrchi nobo lo krea e klaridat ku nos ta kere ku mester tin. E Park & Ride tin su meta i no ta e intenshon pa hende stashoná nan outo na e luga konserní”, asina BIA ta skibi riba entre otro medionan sosial. 

Kastigabel

BIA ta sigui bisa tambe ku ta kastigabel pa stashoná outo kaminda esaki ta prohibí. “Huntu ku Marechaussee nos a kuminsá un trayekto di duna mas informashon pa konsientisá hende pa un uso korekto di e diferente espasionan dilanti aeropuerto”, asina BIA a skibi.