WILLEMSTAD –  Den un deklarashon di prensa Caribbean Petroleum Refinery ta desmentí ku el a kumpra i almasená zeta Venezolano den e tankinan di Bullenbaai. A akusá e kompania, ku a kaba lanta i ku ta di dos Venezolano ku pasaporte Merikano, ku nan a violá e lei di sanshon Merikano.

Siman pasá Associates Press a publiká un artíkulo tokante un karga di 600.000 barí di zeta di e tènker Colon, ku e aña ku a transkurí a biaha solamente entre e hafnan den Venezuela i kaminda e datonan di lokalisashon marítimo ta mustra ku e tènker, dos dia promé ku el a yega Kòrsou, a karga zeta den e haf di Amuay, e sede di e refineria mas grandi di Venezuela.

Caribbean Petroleum Refinery ta bisa ku e informashon den e artíkulo no ta eksakto, ta sin base i basá riba dokumentashon inkorekto, sinembargo nan no ta korihí e informashon òf divulgá di unda e zeta a bini.

Luis Giusti di Caribbean Petroleum Refinery  no a reakshoná riba e petishon di Associated Press pa duna komentario. Raul Herrera, e otro doño di CPR a bisa ku e enbolbimentu di e susesor previsto pa eksplotashon di refineria Isla tabata limitá na entrega pa almasenamentu na e doño di e zeta ku el a identifiká komo Knob Trading SA, un kompania ku ta registrá na Panama segun un ofisina na Houston ta informá riba su sitio wèb.