WILLEMSTAD –  A bolbe posponé e findishi di arte di Art for the Roses, ku tabata planiá pa mañan. E fecha nobo ta 18 di mart otro aña. E motibu ta e molèster di awa na Landhuis Bloemhof i e persona ku ta enkargá ku e findishi ku ta malu. A hala e findishi un siman atras kaba, pero esei no a resultá sufisiente pa mengua e molèster di awa.

Ride for the Roses ke generá mas tantu fondo posibel pa kuido di pashèntnan di kanser na Kòrsou.

Trintiseis artista a duna oido na e yamada pa krea un obra di arte ku un rosa aden pa Art for the Roses. E eksposishon kaminda por mira esakinan ta terminá mañan, pero por keda mira e obranan den e katalòk digital ku ta riba e sitio wèb renobá di Ride for the Roses (ridefortheroses.net).

Tur hende i empresanan ku tin karchi pa e evento di mañan por usa nan pa e findishi na mart otro aña òf por haña nan sèn bèk si nan ta desá esei.

E katalòk di ofertanan onlain ta sigui funshoná normal i ta aktualis’é regularmente. Hendenan por keda hasi nan oferta via meil. Por haña e katalòk onlain Art for the Roses riba e sitio wèb di Landhuis Bloemhof i riba esun di Ride for the Roses.

Night

E Night for the Roses, ku mester a posponé dos biaha, ta bai pa 13 di yanüari. Hendenan ku a kumpra karchi kaba pa e konsierto ku a para i e Night for the Roses tin tres opshon: nan por usa nan karchi riba 13 di yanüari, òf nan por haña nan sèn bèk serka Landhuis Bloemhof òf nan por skohe pa laga e montante keda aden komo donashon pa Ride for the Roses.

E fundashon Ride for the Roses ta bai dediká tempu awor pa organisá e siguiente edishon di Ride, Walk and Swim for the Roses ku ta planiá pa djadumingu 5 di febrüari 2023.