DEN HAAG – Hulandesnan ku ta biba na Aruba, Kòrsou i Sint Maarten por vota pa un kolegio elektoral nobo pa Eerste Kamer riba 15 di mart 2023.

E kolegio elektoral aki ta duna nan un voto indirekto pa Eerste Kamer. Hulandesnan ku ke vota pa e elekshon aki mester a registrá promé ku 1 di febrüari. Esei mester a sosodé tambe si bo a registrá anteriormente komo votadó den eksterior pa otro elekshonnan.

Te ku awor votadónan pafó di Hulanda por a vota pa elekshonnan di Tweede Kamer i Parlamento Europeo. E elekshon pa kolegio elektoral ta un elekshon indirekto. 

Si bo a yega di partisipá  kaba na elekshon di Tweede Kamer òf elekshon pa Parlamento Europeo, bo ta haña un invitashon pa registrá pa e elekshon di kolegio elektoral. Otro personanan mester hasi nan petishon riba e sitio wèb https://www.denhaag.nl/nl/bestuur-en-organisatie/verkiezingen/kiezers-buiten-nederland.htm

Tur habitante di Aruba, Kòrsou i Sint Maarten ku un pasport Hulandes ta Hulandes. Pero pa por partisipá na elekshonnan na Hulanda bo mester kumpli ku sierto kondishonnan. No ta pèrmití pa bo ta inskribí na un munisipio Hulandes, bo mester tin 18 aña òf mas i bo mester a biba por lo ménos 10 aña na Hulanda. Si bo ta trahando na servisio públiko Hulandes òf bo ta pareha di un persona asina, bo por vota.