WILLEMSTAD – Ayera, riba ‘Dia Internashonal di Derecho di Mucha’ a trit sesenta mucha i nan mayornan riba un dia festivo. Fundashon Cultuur Kameleon a hasi esaki den kolaborashon ku Museo di Mucha Kòrsou i Lot’s Foundation.

Públiko por a gosa di teater di mucha, tayernan di rèp, konstruí òf pinta, snèknan sabroso i na final nan a haña un buki di prenchi di ‘Lot’ pa bai kas kuné.

Keursly Concincion , Defensor nashonal di Pueblo, a habri e dia ku un spich, kaminda el a profundisá riba algun derecho di mucha. El a pone énfasis riba e derecho di enseñansa, awa limpi pa bebe i tambe e derecho riba protekshon. E ultimo aki el a hustifiká ku e mucha tin derecho riba un bida sin kastigu físiko, ni un klap pa koregí. Ta un derecho pa trata un mucha bon ku palabra, no kibr’é i  no usa palabra ofensivo, segun e Defensor di Pueblo.

Despues Esmée Pieters a sigui ku su presentashon ‘Lot van Curaçao’ ku el a produsí huntu ku Herman van Veen. Lot ta un mucha muhé ku un tata Kurasoleño i un mama Hulandes. Pa motibu di divorsio di su mayornan el a muda na edat hóben pa Hulanda i konsekuentemente tin dos kas. Tabata hasi e muchanan diferente pregunta ku ta pone nan pensa mas profundo riba ‘derechonan di mucha’. E presentashon tabata na dos idioma. Despues e dia a sigui ku diferente tayer, entre otro tayer di rèp ku e rèpdó Zealous.

E kontinuashon riba e dia aki ta un proyekto di enseñansa tokante derechonan di mucha pa grupo 6,7 i 8.