ORANJESTAD- Entidat Públiko Saba (OLS) i un delegashon di ministerio di Salubridat, Bienestar i Deporte(VWS) riba 17 di novèmber a deliberá tokante traslado médiko. Durante e kombersashon OLS a kompartí su preokupashonnan ku Sekretario General suplente Abigail Norville di VWS. 

VWS ta tuma e preokupashonnan akí na serio. Na mei di e aña akí a hasi e promé palabrashonnan nobo. E palabrashon di mas importante ta e proyekto piloto tokante traslado direkto pa Medical Center (SMMC). Esei ta nifiká ku ZJCN no mester di duna pèrmit mas di antemano pa un traslado. E espektativa ta ku esaki lo aselerá e proseso i ku e proseso lo kana ménos burokrátiko. E proyekto piloto a start riba djaluna 21 di novèmber.

OLS ta preokupá ku e proseso relashoná ku traslado médiko i ku ta tuma muchu tempu pa haña un afsprak ku un spesialista. Si e asegurado ta di opinion ku algu no ta bon reglá òf ta dura muchu largu, e ora ei e por entregá un keho via e prosedura di keho normal di ZJCN. Tambe OLS ta pidi atenshon tambe pa transporte di pashènt ku avion den kaso di traslado médiko. Por ehèmpel ta haña e avion muchu chikitu i pa e motibu ei no ta ta sinti nan mes tur ora seif. 

Konstruktivo

Segun partidonan a bisa, e kombersashon a kana di manera konstruktivo, durante kua VWS a duna di konosé ku lo bai investigá e posibilidat pa hasi mas uso di Winair pa transporte di pashènt. Sekretario di estado Van Ooijen tin intenshon di bishitá Saba den desèmber, durante kua e lo diskutí adelanto di e mehorashonnan.

Straño si ta ku mientras ku komeberashonnan di Saba i VWS a tuma lugá na St. Eustatius, e isla aki a wòrdu ekskluí di e komeberashonan entre e dos partidonan. Esaki ta pekuliar, ya ku St. Eustatius tin eksaktamente e mesun problemanan ku ta biba na Saba.