WILLEMSTAD – Dia 19 di dezèmber ocho miembro di e gabinete lo pidi despensa pa e pasado di sklabitut. Na Sürnam minister Franc Weerwind di Protekshon di Derecho lo hasi esaki i Promé Minister Marc Rutte na Hulanda.

Na komienso di e luna aki ya a sali na kla ku e gabinete lo mustra duele. Esaki lo ta un reakshon riba e kolegio di konseho  ‘Dialooggroep Slavernijverleden’. E kolegio aki a boga pa un despensa ofisial di parti di estado Hulandes.

E sobrá seis mandatario di e gabinete lo biaha pa e islanan Karibense pa aya pidi despensa. Segun NOS sekretario di estado Eric van der Burg di Asilo ta hasi esei na Aruba, minister Karin van Gennip di Asuntunan Sosial na Boneiru, sekretario di estado di Relashonnan di Reino Alexandra van Huffelen na Kòrsou, sekretario di estado di Finansas Marnix van Rij na Sint Eustatius i sekretario di estado di Bienestar Maarten Ooijen na Saba. Minister Ernst Kuipers di Salubridat Públiko lo pidi despensa na Sint Maarten.

Sosten

E sosten pa pidi despensa pa e pasado di sklabitut a krese den komunidat, asina e matutino Trouw ta informá. Si na yanüari 2021 tres di kada djes Hulandes tabata na fabor di un despensa, awor e ta kuater riba djes. Tambe e porsentahe  di hende ku ta haña e ròl ku Hulanda a hunga den pasado di sklabitut ‘serio’, a oumentá di 56 pa 63 porshento.

Esaki ta resultado di un enkuesta ku I&O research a hasi den koperashon ku NOS i Trouw. Riba instrukshon di Trouw e büró di investigashon a tene un enkuesta na yanüari 2021 riba opinion públiko tokante e pasado di sklabitut.

“Nos ta mira, kompará ku aña pasá, un kambio kla”, e investigadó di I&O Asher van der Schelde ta bisa. “Esaki ta okashoná pasobra Hulandesnan sin pasado migratorio a bai pensa otro riba esaki.”

Anteriormente un kuart tabata na fabor i awor un tersera parti. Hulandesnan, ku un pasado migratorio, ta den mayoria ketu bai na fabor.