THE BOTTOM/WILLEMSTAD- Den komienso di siman un delegashon di e Konseho Insular di Saba tabata tin un enkuentro ku gerensia di Banko Maduro na Kòrsou. 

Meta prinsipal di e reunion tabata pa pidi atenshon pa e situashon bankario na e isla. Despues ku kompania hermana Windward Island Bank (WIB) a sera su brènch riba e isla, e situashon a bira basta difísil pa e klientennan ku MCB/WIB tin riba e isla. 

E situashon aki a empeorá na momentu ku a muda e klientenan na St. Eustatius ku Saba for di WIB i pone esakinan bou di MCB Boneiru. Espesialmente den e dianan despues di e traspaso riba dia promé di novèmber último, tabata tin hopi keho. Vários kliente no por a subi nan kuenta den e onlain banking, i otro tabata tin problema ku nan karchi di bankomátiko. 

Solushon

Gerensia di MCB, ku a presentá ku no ménos ku kuater direktor na e reunion, a primintí di bai studia wak kiko por hasi pa sirbi e klientenan na Saba na mihó manera. Direktor general di MCB, Chicú Capriles a bisa ku MCB a keda soprendí pa e kantidat grandi di kliente ku a keda fiel na MCB, despues ku surkursal físiko riba e isla a sera. 

Aunke ku MCB no ta konsiderando pa habri otro surkursal na Saba, ta pensando si riba maneranan inventivo pa por sirbi e klientenan na Saba na un mihó manera, por ehèmpel pa medio di un asina yamá ‘pop-up store’ kaminda un representante di banko lo ta na e isla pa atendé direktamente ku e klientenan.