Kralendijk- Den tur e kompanianan di telekomunikashon na Boneiru, TELBO ta esun ku ta mas poko-poko pa resolvé keho di kliente.

Esei ta sali na kla for di un enkuesta ku ABC Online Media, huntu ku e kompania Linkels & Partners a ehekutá den dianan tras di lomba. Na tur tin 228 kliente ku a yena e enkuesta. Mayoria di e partisipantenan na e enkuesta ta kliente di mas ku 1 kompania.

E kompania ku ta skor mihó pa loke ta traha di resolvé keho ta Flamingo TV. Segun e respondentenan, den 76% un keho na Flamingo TV ta keda resolvé sea hopi lihé (32%) òf lihé (44%). E kompania ku ta skor na di dos lugá ta UTS/Chippie. Aki 42% di respondente ku kehonan ta wòrdu resolvé sea hopi lihé (10%) òf lihé (32%).

Na Digicel kliente ta ménos positivo tokante e spit ku kua ta atendé keho. 9% ta deskribí esaki komo ‘hopi lihé’ i 21% komo ‘lihé’.

Nu último lugá ta bini TELBO. Segun respondentenan, na TELBO 3% di respondente ta sinti ku TELBO ta atendé ku keho di forma ‘hopi lihé’, mientras ku 14% ta opiná ku esaki ta lihé.

Poko-poko

A wak tambe e otro banda, o sea kuantu respondente ta di opinion ku ta resolvé keho sea hopi poko-poko òf poko-poko. Esun ku ta skor mihó aki ta atrobe Flamingo TV, di kual solamente 8% di respondente a bisa ku nan ta poko-poko òf hopi poko-poko pa resolvé keho. Na UTS 14% di respondente ta kalifiká e spit pa resolvé problema sea hopi poko-poko òf poko-poko. Na Digicel 24% di respondente ta di opinion ku ta atendé nan keho sea hopi poko-poko òf poko-poko.

Na final, esun ku a skor mas malu riba e aspekto aki ta TELBO, kaminda no ménos ku 53% ta opiná ku kehonan ta wòrdu resolvé sea hopi poko-poko (28%) òf poko-poko (25%).

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag