WILLEMSTAD – Aña pasa riba Dia Internashonal pa Personanan ku un Desabilidat e fundashonnan a informá pa medio di e arkitekto sra Panneflek-de Lanoy di e rampa ku lo bai bini na e Suaré/Gazebo. Esaki komo un símbolo di aksesibilidat i inklushon. 

Dia 3 di desèmber proksimo ta Dia International di Personanan ku un Desabilidat. Un fecha deklará pa Nashonnan Uni pa dediká atenshon na e dignidat, derechi i bienestar di personanan ku un desabilidat. 

E aña aki lo bira di 3 aña ku diferente organisashon na Kòrsou ku ta traha pa personanan ku un desabilidat a uní huntu pa dediká atenshon na e dia. Pa e di 3 bia aki lo bai tin un feria riba Brionplein pa asina selebrá e abilidatnan di personanan ku un desabilidat. Den kuadro di e feria aki entre 6’or i 7’or lo tin inougurashon di un rampa ku a keda trahá na e gazebo/suaré riba Brionplein spesial den kuadro di e Dia Internashonal di Personanan ku un Desabilidat. 

Nashonnan Uni ta splika ku un hende por ta mas desabilitá pa e infrastruktura di un pais kompará ku su kondishon mes. Pasobra si tur kaminda ta aksesibel lo bo no mira e diferensia entre un hende ku tin un desabilidat òf no tin. Netamente pesei e diferente fundashonnan a hasi e esfuerso, tuma e batuta di liderasgo pa mustra ku por i stimulando mas instansia i organisashon tambe pa tuma e inisiativa pa hasi nan establesimentu aksesibel. 

E rampa aki ta duna posibilidat pa un persona ku desabilidat fisiko severo òf ta den un ròlstul por subi riba e gazebo/suaré. 

E feria riba su mes tin e titulo di selebrá abilidat paso e dia ei lo pone enfasis riba abilidatnan. Lo bai tin tènt ku diferente produkto i servisionan ku lo keda eksponé pa Kòrsou presensia. Kosnan manera dekorashon di pasku traha di palu, stulnan i bankinan traha di palèt, berdura fresku di kunuku, kos di boka dushi, masashi i mas. Lo tin tambe e diferente fundashonnan ku lo tei pa duna informashon di nan organisashon.

Mas inklusivo

Tur esakinan ta un paso mas dilanti na un Kòrsou mas inklusivo. Pesei hinter Kòrsou tin e oportunidat pa eksperensia e personanan durante nan momentu djasabra awor 3 di desèmber kuminsando 2’or di merdia na Brionplein.