WILLEMSTAD – Servisio di Impuesto di Kòrsou tin mas ku ochoshen pagadó di impuesto den su sistema ku no ta konosí serka Banko di Seguro Sosial i Kámara di Kòmersio.

Servisio di Impuesto tin problema ainda na momento di imponé balotashon pa motibu di datonan ku no ta korekto òf ku ta insufisiente den e propio sistema di CRIB.

Ta hasi un kantidat grandi di e balotashonnan ainda manual, loke ta trese retrasonan inesesario i tambe eventual foutnan.

Hulanda Karibense

Un grupo di trabou special ta limpiando e asina yamá archivo di CRIB. Servisio di Impuesto di Hulanda Karibense ta duna Servisio di Kòrsou un man den esaki.

Pronto e grupo di trabou ta bai hiba kòmbersashon pa un posibel sinkronisashon di e archivonan di Servisio di Impuesto, Kadaster i Domeinbeheer.

Tambe lo bai trata pa yega na semehante  interkambio periódiko di dato entre Kranshi i KvK. Mester kuminsá ainda ku e kòmbersashonnan aki.