KRALENDIJK/THE BOTTOM- Un delegashon di Cooperativa Piskabon ta di bishita na Saba entre 30 di novèmber pa 5 di decèmber. E bishita aki a ser inisia i organisá dor di Piskabon. Sentral durante e bishita aki ta interkambio di konosementu, fortifiká koperashon i hermandat entre e komunidat nan di peska di Karibe Hulandes. 

Riba petishon di Piskabon e representante di Wereld Natuur Fonds, Stacey Mac Donald, tambe a uní ku e delegashon.

Durante e bishita aki Piskabon lo sera konosi ku e direktiva di Saba Fisherman Association. E intenshon di e interkambio ta pa komparti konosementu i eksperensia ku otro. Asina aki e organisashon nan ta yuda otro pa fortifiká nan posishon den nan komunidat.

Piskabon lo sera konosí tambe ku Saba Conservation Foundation i e unidat di Saba Bank Management pa por siña tokante nan involvementu den e sector di peska di Saba. E intenshon ta pa investiga kiko ta e posibilidat nan pa traha huntu pa por sigi yuda fortifiká i konserva e sektor di peska di Boneiru na bienestar di e piskadó Boneriano.

Torneo

E bishita ta tuma lugá den e siman di Saba Day, na momentu ku e tan konosí torneo, Saba Day Wahoo Tournement ta ser organisá. Esaki ta un torneo di peska di Mulatu. Piskabon a sera un grupo di piskadó nan Boneriano di diferente generashon pa partisipa na e torneo aki. Banda di kompetensia sano, e partisipashon di Piskabon na e torneo ta pará pa hermandat i fortifiká e relashon entre piskadó nan i e komunidat di peska di e isla nan ruman.