WILLEMSTAD – Museo di Kòrsou ta anunsiá apertura di dos eksposishon di e tan famá artista Tirzo Martha. E promé eksposishon yama Tirzo Martha: Monokromátiko króniko. E di dos eksposishon, ku ta den e tayer di e artista, ta mustra e otro parti di e seri aki.

Segun Curaçao Art ta ilustrá riba www.curacao-art.com e karera di Tirzo Martha ta ámplio i variá. E ta traha eskultura- i videonan i ta aktua ku regularidat komo un artista di representashon. Su impulso pa traha arte ta bini di su embolbimentu humanitario i sosial.

Monokromo króniko

Na 2018 Tirzo Martha tabata tres luna den hòspital tantu na Kòrsou komo na Colombia pa motibu di un inflamashon di kurason. E eksperensia aki tabata inspirashon pa Monokromo króniko ku el a traha entre 2021 i 2022.

E seri ta konsistídi 28 eskultura monumental di betòn, heru, palu, lampi-tl i diferente material manera tel’i paña, kabei falsu, pòch’i wc, imahennan di betòn i waya galvanisá.

Loke ta resaltá mas ta ku tur eskultura den e seri aki ta blanku blanku, ku eksepshon di e ophetonan ku ta forma parti di e eskulturanan den nan kolónan natural.

Dia ku Tirzo tabata den hòspital tur kos rondó di dje tabata blanku, mashinnan, murayanan, kortinanan i e ünifòrm di e enfermeranan. Despues di a sali for di hòspital e palèt di koló di mundu eifó a basha riba dje.

E seri ta úniko pasobra tur e obranan, ku eksepshon di unu, no tin título. Hopi biaha un título tin un ròl esensial den arte. Serka Tirzo esei ta hopi biaha misterioso, sorpresivo i na promé instante inkonsistente.

E seri ta trata temanan sosial aktual ku ta stroba desaroyo i kresementu di hende. Pandemia, guerra na Ukrania, baimentu atras di enseñansa, desempleo, korupshon i rasismo ta e temanan ku Tirzo ta trese dilanti den su obranan monumental.

Apertura di e promé eksposishon den Museo di Kòrsou tabata ayera nochi 7’or. E di dos apertura den e tayer di Martha ta riba djasabra 3 di dezèmber pa 10.30. Fruteria Bashí ta e tayer di Tirzo Martha i ta situá na Mohikannenweg 8, riba tereno di Klínika Kapriles.