KRALENDIJK – Nos isla Boneiru ta sòru pa un dushi ambiente di zomer na Amsterdam. For di 5 di desèmber por mira un promoshon spesial ku ta kore den kapital di Hulanda. E akshon úniko i dibertido akí ta un idea di Tourism Corporation Bonaire (TCB), kaminda un tram di e kompania di transporte munisipal GVB, kompletamente di plak ku steker lo duna koló na e kayanan di Amsterdam.

Komo munisipio spesial di Hulanda i alabes e promé destinashon blou na mundu, Boneiru ta prinsipalmente konosí pa su sitionan di buseo i posibilidatnan di deporte akuátiko inigualabel. Nos isla tin un enfoke riba su naturalesa abundante i su patrimonio riku, un esfera ku por mira bèk riba e ‘Tram Boneiru’.

Gana un biahe

‘Ku e Tram Boneiru nos ta trata na sòru pa un ambiente plasentero di zomer den e lunanan skur di wenter akí’, segun Miles B. M. Mercera, direktor di Tourism Corporation Bonaire. ‘Ku e akshon úniko i dibertido akí nos ta pone Boneiru atrobe bou di atenshon di nos famia hulandes. Den luna di desèmber i yanüari hende gusta orientá nan mes un biaha mas riba nan siguiente vakansi, un bunita oportunidat pa e Tram Boneiru. Banda di e potrètnan bunita i e kolónan alegre riba e tram, tin posibilidat pa gana un biahe fantástiko. Asina ku nan mira e tram, nan tin ku saka un potrèt na un lugá seif, ku nan por manda pa nos pa di e manera ei nan tin oportunidat pa gana un biahe di nan soño ku tur kos inkluí.’

Boneiru su enfoke renobá a kontribuí na e echo ku nos isla a krese bira un destinashon di luho, kultura i aventura. Un ‘rebranding’ kompleto di tur aktividat di merkadeo ta parti di esaki. Efektivamente e Tram Boneiru.