KRALENDIJK- Komishon fiho di Konseho Insular pa Maneho i Sosten den un reunion di komishon dia 5 di desèmber a deliberá tokante e proposishonnan di kambio den e ordenansa di impuesto di turista.

Kolegio Ehekutivo a entregá e proposishon pa solushoná algun punto di komplikashon. E puntonan di komplikashon akí a bini dilanti den e evaluashon ku nan a ehekutá. E dos proposishonnan di kambio mas importante ta adaptashon di e durashon di bálides na 4 siman, pa evitá pago dòbel na momentu di ‘Island Hopping’, i e tarifa abou pa personanan ku a nase na Boneiru i ku ta biba den eksterior.

Konseho Insular a disidí pa no implementá e kambionan akí ainda i pa warda riba un evaluashon mas amplio promé. Den esaki mester wak entre otro e grupo di studiante boneriano ku no ta kai bou di e lei di finansiamentu di estudio BES, pero pa kende Konseho Insular gustosamente ke un dispensashon sí. For di e evaluashon a resultá ku esaki su ehekushon ta téknikamente difísil pa e grupo limitá akí. Ademas, ku e kambio kaminda personanan ku a nase na Boneiru ta bai paga e tarifa abou, e grupo akí lo bai kai bou di e tarifa abou akí tambe.

Desapuntá

Diputado Thielman ta desapuntá ku no a implementá e kambionan proponé i ku a kita e evaluashon for di agènda di Konseho Insular dia 6 di desèmber. Komo konsekuensia di esaki e grupo ku ta hasi ‘island hopping’ i e grupo di persona ku a nase na Boneiru pero ku aktualmente no ta biba na nos isla, ta sigui paga e tarifa haltu di 75 dòler pa kada biaha ku ta drenta Boneiru.