PHILIPSBURG – Hulanda i Sint Maarten a duna lus bèrdè e siman aki pa start ku fase 1 pa konstrukshon di un prisòn nobo riba e isla. E sèn, alrededor di 4 mion dòler, ta bini di Hulanda.

Segun kalkulashon fase 1 lo dura na tur binti luna i mester entregá un plan maestro kompleto, kaminda tin e diseño pa e fasilidatnan di transishon pa alohamentu temporal di e prisoneronan, komo tambe e proseso di diseño i oferta pa konstrukshon di e prisòn nobo.

Punto krítiko

Pa motibu di algun retonan struktural den e último desenionan e infrastruktura di detenshon di Sint Maarten a yega un punto krítiko, di manera ku mester a tuma desishonnan fuerte pa un rumbo nobo pa e sistema di detenshon pa e pais.

Sekretario di estado señora Van Huffelen a asentuá e importansia di firmamentu di e akuerdonan pa e komunidat di Sint Maarten: “Nos ta hopi kontentu ku nos por a firma e akuerdo aki awe. Hopi hende a traha hopi duru pa yega na e momentu aki pa sigurá  konstrukshon di un prisòn nobo ku lo kumpli ku normanan internashonal. E dos paisnan i Estados Unido a uni forsa huntu pa lanta esaki for di suela. Ta un paso importante dilanti.”

Gobièrnu Hulandes a pone 30 mion dòler disponibel pa mehorashon di e sistema di prisòn na Sint Maarten, di kual kuater mion dòler pues ta pa e promé fase di e proyekto.