PARAMARIBO- Despues di un periodo hopi largu di preparashon i despues di mas ku un aña sin avion propio, Surinaamse Luchtvaartmaatschappij (SLM) lo bolbe haña su propio avion. Ta trata di un Boeing 737-800.

Aunke tabata papia basta tempu kaba tokante di hürmentu di e avion nobo, e siman aki direktor interino di e kompania estatal a pone su firma bou di e kontrakto ku AerCap, un di e hürdónan mas grandi di avion na mundo.

Te awor aki, e avion tin registrashon Merikano, N, pero de futuro esaki lo mester kambia si. Aktualmente ta hasiendo diferente buelo di prueba, pa hinka e avion den operashon mas pronto posibel. E avion lo bai sirbi e rutanan regional, manera Kòrsou, Aruba i Miami. 

SLM tin mas ku un aña ta bula ku avion ku ta hür di otro kompania di aviashon, Huntu ku tripulashon. Esaki ta nifiká ku tur pilot i tambe stiwardès di SLM mes tabata sinta na kas, sin hasi nada. 

Trinidad

E siman aki a anunsiá tambe ku SLM lo bolbe operá buelo pa Trinidad, den kombinashon ku su buelonan pa Kòrsou, manera tabata e kaso den pasado. Esaki ta nifiká ku lo bin mas opshon riba e ruta entra Kòrsou ku Port-of-Spain ku awor aki ta wòrdu sirbí solamente pa Caribbean Airlines.