KRALENDIJK- Djabièrnè mainta a tuma lugá entrega di sertifikado na kursistanan ku a sigui e kurso di Bonaire In-Depth and Guiding Skills. Ántes e kurso tabata konosí pa e nòmber di Tourguide. 

A inisiá ku e kurso 8 di sèptèmber 2022 i a terminá 30 di òktober e aña aki. Pa motibu di e planning di cruiseship i bishita di ministerie di VWS, a pone ku entrega di sertifikado a tuma lugá te awor. Diesseis persona kuminsá i kaba e kurso. Seis di e hendenan ta finansiá pa Plenchi di Trabou. 

Normalmente hendenan di otro nashonalidatnan, (no boneriano) ta partisipá na e kurso, pero danki na Plenchi di Trabou, tabatin hopi hende lokal e biaha aki. Ta yama danki inmensamente pa koperashon di Plenchi di Trabou, den esaki i spera di sigui konta ku nan. E kurso no ta pa hende ku solamente ta hasi paseo rònt Boneiru. E ta tambe pa tur hende ku ta deseá pa sera konosí ku Boneiru. 

Konosimentu i eksperensia

Tambe a bisa -masha- danki pa Fundashon Forma i TCB ku a hasi esaki posibel pa tur hende i spesialmente pa Sue Felix i Rona Aguilar, ku a trese nan konosementu i eksperensia na e kursistanan. A yama danki na diputado Hennyson Thielman, pa su presensia i pa a sinta tende e eksperensianan di e kursistanan. Sigur tur hende ta kontentu ku kursistanan, spesialmente esnan ku a duna e kurso ta super orguyoso di nan.  

Pa esnan ku ta interesá pa sigui ku kurso manera esaki, por pasa libremente na Fundashon Forma na Kaya Grandi 24, den MG Mall na piso 3, pa inskribí.