KRALENDIJK- E partido M21 djadumingu anochi a saka un komunikado, ekspresando sosten pa e kaso ku e fundashon di konsumidó UNKUBON ke entamá kontra di estado hulandes, pa loke ta trata e echo ku no ke stipulá un mínimo sosial pa kaba. 

“Mi a tuma nota di e kaso ku UNKOBON a entamá kontra estado Hulandes. Un kaso bon dokumentá den mas ku 90 página, kaminda a duna historia i echonan di e desaroyo di provishonnan sosial ku mester a drenta na vigor ku kambio di nos struktura estatal 10-10-10. E esensia di e kaso ta pa pidi korte instruí gobièrnu Hulandes pa despues di 12 aña ku nan a bira parti di estado Hulandes pa stipulá awor si un mínimo sosial i asina kumpli ku nan responsabilidat di kuido, di akuerdo ku artíkulo 20 di nos konstitushon den relashon ku artíkulo 1 di e mesun konstitushon, keda implementá”, asina Daisy Coffie di M21 a trese dilanti. 

E lider polítiko ta mustra riba e echo ku tin dos rapòrt, esta un di NIBUD riba proposishon di Konseho Insular i un di Regioplan riba proposishon di gobièrnu Hulandes mes, ku tur dos a indiká kla, ku e entradanan mínimo di nos hendenan, tantu esnan ku ta risibí ònderstant, esnan ku ta kobra penshun di behes i penshun di biuda i huérfano, pero tambe e suèldu mínimo pa esnan ku ta traha no ta alkansá pa kubri e gastunan mensual haltu. “Ounke nos por a mira un adelanto chikí den esaki, ainda nos ta leu for di mínimo sosial ku e dos rapòrtnan a indiká. Defensor di pueblo, pero tambe e Kolegio di Derechonan Humano na vários okashon a hala atenshon di gobièrnu Hulandes riba e fayo aki, pero sinembargo esaki no a move e gobièrnu Hulandes pa realisá e mínimo sosial”, segun Coffie ta trese dilanti.  

Uni

M21 ta sigui bisa den su komunikado ku nan por uni na mes kompletamente ku e esfuersonan legal di UNKOBON ku den un forma kla i transparente a mustra den nan kaso, ku Hulanda ta violá nos konstitushon. 

“Nan ta para ariba ku si usa e sistema pa kalkulá e mínimo sosial, esaki no por yega na otro konklushon ku e montantenan ku a keda stipulá te awor ta leu for di e realidat riba nos isla. Esaki ta pone ku pa 12 aña largu un gran parti di nos komunidat, esta un 40% a i ta biba bou di e liña di pobresa i ku hasta ta biba den miseria. Algu ku no ta aksepta¬bel i ku mester korigí ku urgensia”, asina Coffie ta konkluí na nòmber di M21.