WILLEMSTAD – Konseho Sosial-Ekonómiko di Kòrsou (SER), ta bira presidente di International Association of Economic and Social Councils and Similar Institutions pa e próksimo dos añanan.

Segun e statútonan di AICESIS kada dos aña ta toka na turno  na un di e kontinentenan pa presidensia di e asosiashon.

Aktualmente e region di Asia, Eurasia i Medio-Oriente ta presidente. Ta pasa e posishon aki na òktober otro aña pa SER di Kòrsou, ku ta representá Amerika Latina i e área di Karibe.

E meta prinsipal di e asosiashon ta pa enkurashá i promové diálogo i interkambio entre su miembronan i,  riba un nivel mas haltu, stimulá diálogo entre partnernan ekonómiko i sosial na mundu.

AICESIS ta konta ku mas ku 70 miembro, es desir konsehonan sosialekonómiko i instansianan similar pa diálogo sosial ku ta partí bon balansá riba e diferente kontinentenan.

Djesocho porshento di su miembronan ta konsehonan di Amerika Latina i e área di Karibe, 36 porshento ta bini di Europa, trinta porshento di Afrika i djesseis porshento di Asia/Eurasia i Medio Oriente.

E asosiashon tin miembronan komun, opservadónan i miembronan asosiá, manera organisashon- i institushonnan internashonal. A lanta AICESIS na yüli 1999 na Port Louis, na Mauritius. E ofisina prinsipal ta establesé na Bruselas, Bélgika.

Konkretamente e presidensia ta enserá ku SER di Kòrsou ta duna guia na AICESIS pa un periodo di dos aña i ta promové e kolaborashon di e asosiashon ku su partner- i retnan.