WILLEMSTAD – Ayera Recherche Samenwerkingsteam RST a tene entrada hudisial den tres kas di dos sospechoso na Sint Maarten i na Kòrsou.

E entradanan a tuma lugá en konekshon ku un investigashon yamá “Helsinki”, kaminda tin sospecho ku entre otro un (anterior) miembro di direktiva di un asina yamá sosiedat anónimo di gobièrnu a kometé froude i korupshon. No ta konosí ta di ken ta trata i tampoko di kua entidat di gobièrnu. E investigashon ta kanando ainda i no ta ekskluí mas detenshon òf entrada. 

RST ta realisá e investigashon bou di guia di e Tim Sentral di Parkèt di Prokuradó di Kòrsou, Sint Maarten, Boneiru, Sint Eustatius i Saba.

E Tim Sentral ta dirigí su mes riba un aserkamentu spesialisá pa kombatí korupshon i kriminalidat destruktivo. E tim ta hasi  investigashon penal ku un komponente finasiero-ekonómiko i ku embolbimentu di Politically Exposed Persons (PEP), ámtenarnan, sosiedatnan anónimo di gobièrnu, fasilitadó- òf organisashonnan den e sektor kolektivo. Banda di korupshon e kriminalidat internashonal aki ta konsistí hopi biaha di froude di impuesto i labamentu di plaka.