WILLEMSTAD – Turistanan ku ke bishitá Kòrsou den futuro mester yena datonan di e faktura di nan estadia riba e karchi di imigrashon digital. Esei ta aloménos un di e rekomendashonnan ku  Belasting Accountants Bureau BAB ta hasi pa haña un kòntròl riba e sektor di hür riba e isla.

Antilliaans Dagblad ta menshoná algun otro rekomendashon ku mester amplia e kumplimentu. Muchu hürdó di establesimentunan di fakansi no ta entregá impuesto riba nan entrada, di manera ku gobièrnu di Kòrsou ta pèrdè entrada.

BAB ta sugerí tambe pa redusí e tarifa di OB pa hürdónan di tempu korto pa asina duna un estímulo pa tòg paga impuesto. Lo mester obligá empresanan di mediashon manera Booking.com i Airbnb pa lei pa duna detaye di hürdonan i nan entrada na servisio di impuesto. Mester por kobra nan tambe impuesto di benta.