WILLEMSTAD – Kòrsou mester resolvé desempleo, desigualdat i pobresa. Esei Banko Sentral ta skirbi den su boletin ekonómiko di dezèmber 2022. E último desenio desempleo, desigualdat i pobresa a oumentá pa motibu di diferente krísis.

“E krísisnan a afekta spesialmente e gruponan vulnerabel den e komunidat, entre kua esnan ku ménos formashon, hóbennen i migrantenan”, presidente di Banko Sentral, Richard Doornbosch, ta bisa. 

“Den un komunidat ku desigualdat ekonómiko i sosial e chèns pa bienestar no ta partí igual i konsekuentemente no ta probechá di e potensial di e prosperidat kompleto.”

Investigashon 

Resientemente Banko Sentral a laga hasi un investigashon di e efektonan di desigualdat riba kresementu ekonómiko den ekonomianan chikitu. Pa motibu di falta di sifranan aktual di desigualdat na Kòrsou a usa den e investigashon datonan di 43 otro pais chikitu ku por sirbi komo representashon.

“E estudio aki no ta konfirmá e resultadonan resien den e literatura ekonómiko kaminda desigualdatnan grandi por tin un efekto negativo riba kresementu ekonómiko. Di otro banda tin ku por ehekutá maneho pa enfrentá desigualdat den e komunidat sin ku tin ku preukupá ku esaki lo stanka kresementu ekonómiko”, segun Doornbosch.

Kresementu inklusivo 

Palabra klave den e materia aki ta ‘kresementu inklusivo’. “Por papia di esaki ora tur hende den e komunidat tin chènsnan igual pa kontribuí na esaki i probechá di dje”, Doornbosch ta splika.

“E agènda polítiko pa yega na un kresementu mas haltu na Kòrsou mientrastantu ta konosí. Mehorashon di e klima di invershon, oumentá resistensia pa golpenan via diversifikashon ekonómiko, realisá finansas gubernamental sano, oumentá resistensia di infrastrukturanan krítiko kontra desasternan di naturalesa i garantisá stabilidat finansiero i monetario ta kondisonnan krusial pa un kresementu ekonómiko na Kòrsou.”

Pero na mes momentu Doornbosch ta argumentá ku pa hasi kresementu inklusivo posibel, mester tuma lugá un kambio den e énfasis riba medidanan polítiko.

“Asina mester inkorporá inklushon finansiero den e agènda polítiko pa medio di un aksesibilidat mihó pa finansiamentu di empresanan chikí i mediano, pa asina mehorá e klima di invershon .”

Invershonnan 

E strategia di diversifikashon ekonómiko mester kontené segun Doorbosch akshonnan tambe ku ta stimulá invershon den fuentenan di energia alternativo manera solo, laman i bientu. 

Pa loke ta trata finansas públiko mester simplifiká e sistema fiskal pa krea un base fiskal mas ámplio i asina aliviá e gastunan pa entradanan abou i empresanan chikí.

“Ademas e medidanan di saneamentu no por bai a kosto di rekuperashon ekonómiko. Ta p’esei Kòrsou mester dirigí su mes riba un trayekto di saneamentu presupuestario kaminda tin espasio tambe pa invershonnan di gobièrnu”, e ta konsehá.

“Pa hasi e kresemente mas inklusivo, mester enkurashá aktividat empresarial lokal den e sektor turístiko pa asina haña un parti mas grandi di e kadena di balor turístiko.”

“Na mes momentu mester hiba un maneho di merkado laboral mas aktivo ku di un banda ta reforsá insentivo pa traha den e sektor formal i di otro banda ofresé formashon i guia na desempleadonan òf personanan ku ekonómikamente no ta aktivo, pa oumentá nan chèns riba merkado laboral”.

Doornbosch ta aksentuá ku enseñansa ta un katalisadó importante pa kresementu inklusivo. 

“Kòrsou mester krea e espasio nesesario riba presupuesto i duna prioridat na invershon den e sistema di enseñansa pa prepará un aktitut di labor produktivo”, segun e presidente di banko.