WILLEMSTAD – Kòrsou tin 84 kompatriota nobo. Den dos seremonia di naturalisashon nan a hasi e deklarashon di kompromiso dilanti di Gobernador di Kòrsou. E deklarashon di kompromiso ta un kondishon pa optené nashonalidat Hulandes.

E deklarashon ta bisa: “Mi ta deklará ku mi ta respetá e ordenamentu konstitushonal di Reino Hulandes, su libertatnan i derechonan. I ta primintí di kumpli fielmente ku e debernan ku e siudadania ta trese kuné”. Sigui pa: “Esei mi ta deklará i primintí”.

Nan ta risibí e desishon pa bira Hulandes por eskrito. Esei ta un karta di gobièrnu ku ta bisa ku bo a haña nashonalidat Hulandes. 

E gastunan pa naturalisashon ta: Nafl 1839,00 pa un persona, Nafl 2348,00 pa un pareha i pa kada yu ku mester naturalisá Naf 272,00.

Hulandes

Tin diferente manera pa haña nashonalidat Hulandes: outomátikamente na nasementu si un di bo mayornan ta Hulandes, adopshon òf rekonosementu òf e prosedura di naturalisashon.

Strañeronan ku ke haña nashonalidat Hulandes via naturalisashon, mester ta bibá den e parti Karibense di Reino. Nan no mester por papia, lesa, skirbi i komprondé Hulandes so, sino tambe Papiamentu òf Ingles.

Naturalisasshon

E prosedura di naturalisashon tin kondishonnan estrikto ku e strañero mester kumpli kuné pa bira Hulandes. Strañeronan mester ta mayor di edat, sufisientemente integrá, lokual ta evaluá den e idioma Hulandes i Papiamentu.

Strañeronan ku tin sierto sertifikado òf diploma por haña dispensashon pa e prueba di naturalisashon. Tambe den sirkumstansianan spesial (médiko) por haña dispensashon pa naturalisashon.

Promé ku hasi e petishon pa naturalisashon e strañero mester tin atmishon i mester a biba sinku aña sin interupshon dentro di Reino. E periodo por ta mas kòrtiku tambe si bo ta kasá òf ta bibá huntu sin interupshon ku e mésun Hulandes.