WILLEMSTAD – Gasolin i disel ta baha bou di dos florin den e aña nobo. Esei minister Cijntje di Asuntunan Ekonómiko ta bisa riba su página di Facebook. Gasolin ta bira Naf 1,98 i disel ta baha te na Naf 1,79.

Normalmente ta e supervisor di BTU ta informá e preisnan di krudo, pero aparentemente e minister mes ke duna e bon notisia. Asina e ta krea bruhashon tambe.

Minister Cijntje ta skirbi ku ta adaptá e preisnan riba djadumingu 1 di yanüari. Pero preisnan nobo di krudo ta drenta semper na vigor riba e promé djamars di luna i den kasonan hopi eksepshonal riba e delaster djamars di luna. Pues riba djamars 3 di yanüari òf djamars 27 di dezèmber. BTU ta mantené 3 di yanüari.

Na e momentu aki e tarifa di gasoline na pòmp ta algu mas ku Naf 2,35, mientras ku disel ta Naf 2,22. Aweró e diferensia ta 37 sèn ménos pa liter di gasoline i 43 sèn ménos pa liter di disel.