WILLEMSTAD – Wardakosta, Polis i otro outoridat ta bai kontrolá severo riba laman i kantu di kosta durante Fuikdag 2023. Wardakosta ta pidi doñonan di boto di plaser, botonan charter i ‘seadoo’ pa tene kuenta ku e reglanan ku ta konta pa Fuikdag 2023.

Basá riba e medidanan ta prohibí pa bende alkohòl, no ta duna pèrmit pa toka músika riba vlòt- i/òf  podiumnan.

Tur boto mester tin sufisiente salbabida na bordo , mes tantu ku e kantidat di pasahero ku ta pèrmiti na bordo i tambe tur dokumentu nesesario. Tambe mester tin artíkulonan di seguridat na bordo.

Inspekson di Haf i Seguridat  i Wardakosta lo hasi kòntròl riba e botonan. Ademas Brantwer lo hasi kòntròl pa loke ta trata sendementu di kandela na bordo pa barbeque.

Despues di sink’or di atardi no ta pèrmití mas pa toka múzika. Outoridatnan ta bai kontrolá tambe riba agrupamento despues di sink’or na playanan i otro sitio riba laman. 

No ta pèrmití pa buska i trese (‘lift’) persona Fuikbaai. E medida aki ta nesesario pasobra sa sosodé ku hendenan ku ta ‘lift’ sa keda atras, sin ku nan por bai bèk Caracasbaai. Konsekuensia ta ku nan ta kana via tereno privá di Barbara Beach pa yega afó. Tur esaki ta trese mas kaos kuné i no ta tolerá esaki.

Botonan di otro pais mester pasa via Imigrashon i Duana pa deklará. Wardakosta, Kuerpo polisial Kòrsou, Inspekshon di Haf i Seguridat, Brantwer, Santa Barbara Security, Krus Kòrá, Fundashon Kuido Ambulance Curaçao i Citro lo aktua kontra esnan ku no tene nan mes na e medida aki.

Outoridatnan ku ta presente pa kontrolá i duna asistensia durante Fuikdag ta: Wardakosta, Kuerpo polisial Kòrsou, Inspekshon di Haf i Seguridat, Brantwer, Santa Barbara Security, Krus Kòrá, Fundashon Kuido Ambulance Curaçao i Citro.