KRALENDIJK- Bonaire International Airport (BIA) kada bes ta saka komunikado kaminda ta avisá ku ta bai tuma medida kontra di hende ku ta stashoná outo malu riba tereno di aeropuerto, pero al fin nunka no ta aktua.

Ta trata spesífikamente di e área entre a tereno di parker i e edifisio di Daboussi Motors, ku a duna e nòmber di Kiss & Ride pa por baha òf pasa buska pasahero. Den práktika sinembargo, ten hopi hende ku ta stashoná na auto riba e pida tereno aki manera ta un lugá di parker outo gratis. Aunke BIA a pone mas bòrchi i a mensasá ku e echo ku Kmar lo bai aktua kontra di hende ku ta para nan auto riba e área aki, den realidat niun medida no ta wòrdu tumá, ku konsekuensia ku konstantemente e área aki ta yen di auto ku a stashoná einan sea un ratu òf pa basta ora. 

Bewaker

Antes tabata tin bewaker riba tereno di BIA, sigur den temporada di Servisio di Seguridat i Vigilansia (SSV), ku tabata sigurá ku niun hende para dilanti e terminal. Aktualmente no tin niun hende mas ku ta tira bista riba e tereno òf e área ku yama Kiss & Ride.

E aktuashon relahá di parti di BIA ta hopi diferente for di situashon na aeropuerto di Kòrsou i Aruba, kaminda dentro di apenas 1 òf 2 minüt ta yega pa tou auto ku a stashoná kaminda ku esaki no tin mag.