WILLEMSTAD – Kambio di aña a bai trankil na Kòrsou segun polis. Tabatin un persona heridá pa motibu di vürwerk. Un persona a akudí na Curaçao Medical Center riba Aña Nobo mainta i por a bai kas bèk despues di tratamentu.

Kuater pashènt mester a bai hòspital pa motibu di leshonnan risibí durante aksidentenan di tráfiko. Unu mester  keda pa mas tratamentu médiko i e tres otro personanan por a bai kas.

Entre 31 di dezèmber pa 12’or di mèrdia i 1 di yanüari pa 12’or di mèrdia setenta persona a akudí na Sala di emergensia di hòspital. Segun CMC nan dòkter di kas lo por a atendé mayoria di e pashèntnan.

Pa falta di un Sala di emergensia di dòkternan e Sala di emergensia na hòspital ta haña dimas pashènt ku de fakto mester a bai nan dòkter di kas.