WILLEMSTAD – Minister di Finansas ta anunsiá ku ta bai renobá e edifisio di Servisio di Impuesto na Regentesselaan. Ta e intenshon ku e edifisio ta haña su funshonalidat bèk i por bai ofresé servisio na públiko.

Pa realisá esei e ministerio ta buska un direktor di proyekto Renobashon Servisio di Impuesto Kòrsou. Pa motibu ku no ta konosí ainda kuantu ora mester pa e direktor di proyekto i kuantu e proyekto ta bai dura, ta formalisá e enkargo durante e konseshon den un akuerdo por eskrito entre un òf mas outoridat kontratante i un òf mas empresario ya asina por agregá mas enkargo den futuro.

E kandidato mester ta un entidat legal ku ta establesé na Kòrsou i ku ta inskribí na Kámara di Komersio. Mester tin por lo ménos tres aña di eksperensia den maneho di proyekto di renobashon.

Tambe e entidat legal mester tin sufisiente medio finansiero i kapasidat ekonómiko.