KRALENDIJK- Segun kandidato pa e partido polítiko Sion Janga, mester ta posibel ku Boneiru mes por perkurá pasashinan na preis redusi ku su habitantenan. 

“Nos ta mira kon preis di pasashi ta demasiado haltu, loke ta pone bo pensa dos, tres biaha si ta realmente nesesario pa biaha si òf nò. Un biahe di Boneiru pa Kòrsou ku ta dura 20 minüt ta kosta $200 i pa bai Aruba $360. Un studiante boneriano na Hulanda ku kier bin Boneiru tin ku paga entre $1000 i $3000”, asina Janga a trese dilanti.

Segun Janga tin e riesgo ku, pa motibunan di gastu, biahamentu ta bira algu di luho ku solamente hende ku basta entrada por paga. Janga ta mustra riba e echo ku Hulanda ta kida bira riba e asuntu di hasi pasashinan mas pagabel. 

“Algun aña pasá, gobièrnu di Hulanda a laga hasi un investigashon pa wak kon por baha preis di pasashi na Boneiru. Konklushon di e rapòrt akí tabata ku òf Hulanda mester bai supsidiá preis di pasashi òf mester bai sinta ku tur aerolínea na mesa i pone kondishon  skèrpi. Pensa por ehèmpel riba un akuerdo kaminda gobièrnu ta bisa un aerolínea ku su preisnan no por surpasá un montante ku gobièrnustipuláòfun akuerdo kamindagobièrnu ta stipulá kuantu stul un avion mester tin disponibel i kuantu biaha e por bula ida i buèlta.Esaki ta algu ku Fransia ta hasi na e islanan den Karibe ku ta kai bou di dje”, asina Janga a trese dilanti

E polítiko hóben a mustra tambe ku tin un otro instrumento ta uso na diferente pais Europeo, ta introdukshon di deskuento riba preis di pasashi. Na Noruega por ehèmpelgobièrnu a bin ku un akuerdo kaminda ku e aerolínea mester bula entre Oslo i Forde  ku 112.000 stul disponibel pa aña, e mester bula 3x pa dia, su preis di pasashi no mag surpasá $272 i e mester duna un deskuento di 50% na hende riba 67 aña, studiante, hende siegu i hende ku otro limitashon.

Segun Janga e kos di mas tristu ta ku ta for di aña 2018 gobièrnu di Hulanda tin e rapòrt akí, pero nan no kier implementá e konsehonan ku nan a haña pa asina nos na Boneiru por biaha barata. 

Gobièrnu lokal

Aunke ku Janga ta bisa ku ta ferfelu ku gobièrnu di Hulanda no ta bin Punda riba e asunto di supsidio pa pasashi, gobièrnu di Boneiru mes tambe tin vários opshon. “Gobièrnu di Boneiru tambe tin un ròl den e asuntu aki. Gobièrnu a introdusí e impuesto di turista di $ 75. Pa luna gobièrnu ta risibímas òf ménos $900.000. E sèn akígobièrnu por usa pa introdusí deskuento pa nos studiantenan boneriano ku ke bin Boneiru for di Hulanda por ehèmpel. Pero gobièrnu por paga tambe un porsentahe di e preis di pasashi di EZAiri DiviDivi pa bonerianonan ku tin un sédula”, asina Janga a trese dilanti. 

Janga ta mustra riba e echo ku esaki ta algu ku gobièrnu di Boneiru mes por hasi miéntras ta warda riba gobièrnu di Hulanda.