WILLEMSTAD – For di awe 9 di yanüari doñonan di outo, motersaikel i otro vehíkulonan di motor por paga nan impuesto di outo 2023, Servisio di Impuesto ta informá. E tarifanan a keda méskos ku aña pasá i e aña promé.

Pa outonan di 2014 òf mas bieu bo ta paga Nafl. 145 pa mitar aña òf Nafl. 271 pa  henter aña. Pa outonan di 2015 bin ariba e tarifa ta Nafl. 206,50 pa mitar aña i Nafl. 394 pa henter aña.

Doñonan di outonan disel mester paga muchu mas. Mitar aña kosta Nafl. 585,50 i henter aña ta bira Nalf. 1152.

Pa taksi, bùs i vehíkulonan ku tin dispensashon, manera transporte di muchanan di skol, tin tarifanan mas abou. Vehíkulonan pisá manera trùk, èts. ta paga un tarifa mas karu.

Personanan ku paga mitar aña ta haña un steker hel patras di e winshil dilanti i esun ku paga pa henter aña ta haña un steker blou.

Por paga impuesto di outo na ACU Zuikertuin na Sta Maria. Por paga tambe na CPost Internashonal na  Groot Kwartier, Punda, Otrobanda i Sta. Rosa.