Pa Arthur Sealy

Tantu den reunion di Konseho Insular di 11 di mei 2021 komo den reunion di Komishon Fiho di Konseho Insular dia 12 di mei 2021 konsehalnan Tjin Asjoe i Silberie konsientemente a konfirmá ku tin eror hasí usando e  argumento; kaminda hende ta traha por kometé eror.

Pero ta nenga di tuma akshon. Tur eror tin konsekuensia i asta si no kometé eror tambe tin konsekuensia. Hefenan di BonLab i Salubridat Públiko ku ta e dos wowonan di e kadena di kuido di salú ta non aktivo i no ta duna di konosé ki eror nan a kometé. Ken ta responsabel pa e erornan riba tereno di infrastruktura i pèrdèmentu di dokumentu.

Defendé e erornan aki ta trese frikshon den komunidat i ta deber di konsehalnan Tjin Asjoe i Silberie pa komprondé ku nan argumento, kaminda hende ta traha por kometé eror ta destabilisá e sistema polítiko. Konseho Insular tin e deber di kontrolá Kolegio Ehekutivo i no defendé miembro di Kolegio Ehekutivo ku ta aktua konta reglanan di Bon Gobernashon.

E dos mienbronan di koalishon a demostrá di ta sali na interes partidario i no na interes di pueblo.  Mi ta konvensí ku mester bini un kambio den e kultura di maneho i aktuashon di e koalishon MPB/UPB.Pa un maneho atministrativo sano mester baha e diputadonan i skohe pa personanan íntegro, ku bon reputashon, respetuoso i ku nunka a figurá riba un lista polítiko.

Di mes nan lo buska profeshonalnan i no kolaboradónan mará na un partido polítiko manera ta e kaso awor. 

Arthur Sealy