WILLEMSTAD – Djasabra 14 di yanüari a inougurá na Lanthùis Bloemhof e eksposishon ‘Quit My Job, Paint your Life’ di e artista  Christian Peralta. E eksposishon individual aki ta representá kuadronan ekspresivo i figuranan apstrakto di e tempu di awor.

Peralta ta un artista outodidakto multidisplinario ku un pasado den músika, poesia i kontamentu di kuenta oudiovisual. Na 2016 e tabata riba tarima artístiko ora el a regresá di su studio den eksterior.

For di e tempu ei e tabata aktivamente embolbí den esenanan artístiko lokal, a partisipá na hopi manifestashon di arte, a partisipá na e produkshon di sine Watamula di sineasta Kevin Osepa i a aktua na diferente evento di poesia i kontamentu di storia.

Na 2018 Peralta a redeskubrí su pashon pa pinta i a afiliá su mes na IBB. E tempu kòrtiku ku el a pasa einan a yud’é identifiká e loke ku e ke i for di e momentu ei el a keda eksplorá e mundu di arte visual i a desaroyá su propio estilo.

Peralta a keda balorá su abilidatnan i a haña sosten artístiko na Uniarte, kaminda e tabata miembro aktivo te 2021. Banda di su propio obranan Peralta ta tambe miembro di e kooperativa Malsamaritano ku ta impulsá pa komunidat, kaminda e i otro artistanan hóben ta krea i traha huntu na un variedat di proyekto, for di músika te eventonan espontáneo i trabou pa komunidat.

“Mi ta kontentu di por kompartí mi trabou ku komunidat i invitá personanan pa eksperensiá mi biahe den arte,” Peralta ta bisa. “E título di e eksposishon, ‘Quit My Job, Paint Your Life’, ta reflehá mi desishon pa siguí mi pashon pa arte kompleto  i e importansia di sigui bo soñonan i hiba un bida ku ta fiel na bo mes.”