WILLEMSTAD – Stichting Overheidsaccountants Bureau, SOAB, a habri un ofisina nobo na Kòrsou. E apertura tabata motibu pa renobá e imáhen korporativo di e fundashon i lansa e logo nobo.

SOAB tabata 28 aña largu na Skalo i ta sigui awor na Asteroïdenweg na Groot Davelaar. A organisá e alohamentu nobo ku espasio di trabou kompartí inovativo pa sigui ku e manera nobo di traha na kas. 

E edifisio tin seis sala di reunion kaminda e tim por palabrá ku otro òf ku kliente, tantu digital komo en persona, i e ta ekipá ku e último teknologianan. Banda di esei tin espasio kontra ruido pa yama/papia, kaminda por hasi kontakto ku kolega-, afiliado- òf klientenan via kanalnan digital òf via telefon selular.

A lanta SOAB komo fundashon na 1944 komo ouditoria interno di gobièrnu di Antia Hulandes di antes. Komo konsekuensia di e pandemia di corona, un tim di maneho nobo bou di guia di direktor general Raymond Faneyte a disidí di drenta un kaminda nobo, tantu stratégiko komo den manera di traha.

E logo nobo di SOAB ta representá segun nan mes ta bisa e viabilidat di futuro di e organisashon, huntu ku e renobashon ku nan ta trese den e sektor públiko.

A skohé pa un estilo kolorido ku ta representá e dinamismo, diversifikashon i resistensia di e organisashon i su personal. Asina  e komunikado di prensa ta informá.

“SOAB ta pone manera semper e enfoke riba duna diferente servisio dentro di nan portafolio kresiente den e sektor públiko, kaminda e eksperensia di e tim hóben i dinámiko ta mas ámplio ku solamente kontabilidat, pero ta enserá tambe otro servisio manera asesoria,  investigashon i sosten “, segun Faneyte.