WILLEMSTAD – Euro a subi awe na e nivel mas haltu desde aprel 2022 kompará ku e dòler Merikano. Pa Aruba i Kòrsou un balor di euro mas haltu ta nifiká ku un fakansi pa Europa por sali mas karu. Merkansia i servisio prosedente di e paisnan ei ta bira en prinsipio mas karu. Esun ku su salario ta na euro riba e islanan, lo bai gana algu mas ora kambi’é den florin antiano. Djaluna mainta e kurso tabata Naf 1,95 pa un euro.

For di 1971 florin Antiano ta mará na dòler Merikano kontra un tipo di kambio fast di un dòler pa 1,79 florin. Esei ta nifiká ku e florin Antiano i tambe e florin Arubano tin e mesun fluktuashonnan di balor kompará ku e euro komo e dòler Merikano.

E euro, ku aña pasá ainda tabata ménos ku e dòler, ta subiendo pa motibu di e speransa ku lo subi e interes den e zona di euro ku pasonan gigante.

Ayera e euro a subi basta riba e 1,09 dòler. Diferente lider di Banko Sentral Europeo a duna di konosé e último dianan ku lo sigui oumentá e interes e próksimo lunanan pa frena e inflashon haltu.

Promé ku e invashon di Rusia den Ukraina na febrüari 2022 e euro tabata pará na algu mas ku 1,14 dòler. Despues e moneda a baha gradualmente na balor. Na yüli di aña pasá pa promé biaha den binti aña e balor di euro tabata ménos ku e dòler. Esei tabata prinsipalmente debí na e miedu pa un reseshon den e area di e euro i pa motibu di e tasa di interes haltu den Estados Unido, kaminda Federal Reserve a kuminsá mas promé ku Banko Sentral Europeo na 2022 ku oumento di tipo di interes.

Konsekuentemente e dòler a bira mas atraktivo i a subi na balor. Fin di sèptèmber 2022 e euro a alkansá un punto mas abou di alrededor di 0,95 dòler.

Mientrastantu e miedu pa un reseshon fuerte den e zona di e euro a mengua i ta konta kisas riba un kaida ekonómiko leve. Tambe ta spera ku e próksimo tempu banko sentral di Merka lo bai oumentá e interes ménos agresivo, di manera ku e dòler ta bou di preshon i ku esei tambe e florin Antiano.