ORANJESTAD – Anouk Balentina a manda un karta habrí pa Rei Willem Alexander tokante e problemátika di Parkietenbos na Aruba. E aktivista ke pa Rei intervení pa pèrkurá pa garantisá e derechonan fundamental riba salubridat, biba sin molèster y un medioambiente limpi den henter Reino, inkluyendo e habitantenan di Parkietenbos.

Balentina sa ku Rei no tin responsabilidat polítiko – esaki ta kai bou di gabinete Hulandes – pero e ta rekordá  Rei si di su responsabilidat konstitushonal, manera el a bisa ora el a aseptá su reinado: “E echo ku Rei no tin responsabilidat polítiko no kier men ku e no ta karga un propio responsabilidat. Sino e huramentu, ku mi tambe lo hasi  den e Asamblea di Estado aki, lo no sin sentido.”

‘Window dressing’

Según Balentina, gobiernu a bai den overdrive pa purba hinka un imágen positivo  no solamente limpiando tur kaminda ku Rei tin ku pasa, pero pa pèrkurá pa e no mira miseria.

 “Hasta museonan ku ta será pa añanan largu kaba pa públiko, ta habrí pa abo pa un dia so. Lihé lihé ta asfaltá e kaminda pa ofisina di gobièrnu ku un kapa di asfalt nobo, mientras sierto barionan ta roga pa añanan largu kaba pa tapa e kamindanan di tera yen di buraku ku algu di asfalt sin a risibí algu. Dòmtrùknan grandi tambe diripiente a kuminsá bai Parkietenbos pa tapa basura – visibel kaba for di bo avion na momentu di aterisá riba nos aeropuerto –  , sperando ku durante bo presensia lo no e tin kandelanan spontáneo, di kual nos tin ku soportá e huma tóksiko.”  

Balentina a boga pa e problema di Parkietenbos pa hopi aña kaba na tur instansianan lokal te ku awor sin resultado. “Ku tur instansia ta referí entre otro na gobiernu, diferente ministernan responsabel, Parlamento, Ministerio Públiko, Gobernador y wesnan nashonal.”

“Pero tambe serka organisashonnan internashonal y diferente sekretarionan  di estado enkargá ku asuntunan di Reino i Tweede Kamer, no a yuda te ainda. Mi tabatin asta un kòmbersashon personal ku Alexandra van Huffelen, ku ta kompañá bo aktualmente, pero no ta mira niun resultado ainda.”

Garantia

“Di e manera aki nos komo siudadanonan di Reino  no ta gozando di garantia na nivel di Reino,” Balentina ta konkluí. Segun e ta aki gobièrnu di Reino mester tuma su ròl basá riba su funshon di garantia manera stipulá den Statüt.

 “Reino te ainda konsientemente ta bira su kara otro banda i ta bisa kada biaha di nobo ku esaki ta un problema outónomo di Aruba. Pero a pasa e stashon ei basta tempu kaba. No por ta asina ku ta usa  e palabra outonomia komo un èksküs pa pèrmití ku gobièrnu lokal ta keda trapa nos derechonan humano. Kompensashon, – un solushon struktural i duradero -, no ta posibel pasobra Aruba, komo pais outonomo den Reino, mes no ta disponé di e eksperensia, e lei i e kapasidat pa solushoná e problemátika di basura efektivamente.”

Konklushon

“Pues no laga nan stroi santu den bo wowo”, e aktivista ta konkluí. “Mester ta primordial ku nos ta papia di derechonan humano fundamental ku kada siudadano dentro di Reino tin e mésun derecho riba dje. No por ta asina tòg ku nos komo siudadanonan di Reino na Aruba ta haña un otro interpretashon di nos derechonan humano ku otro partinan den Reino??”