KRALENDIJK- Koninklijke Marechaussee (Kmar), ku ta entre otro responsabel pa protekshon di frontera na entrada di biahero ku ta yega e tres islanan di BES, a ninga un total di 115 persona entrada den aña 2022.

Kmar entre otro ta wak ku kua meta biaheronan ta bin e islanan i si ora nan sali nan no a permanesé muchu largu na Hulanda Karibense. “Ora biaheronan ku no ta biba na Saba, Sint Eustatius òf Boneiru bishitá un di e islanan akí, ta averiguá entre otro meta i durashon di e biahe ora nan drenta. Koninklijke Marechaussee ta kontrolá si intenshon di un biahero no ta pa keda mas largu ku legalmente ta pèrmití”, asina Kmar ta splika den un komunikado pa prensa djamars. 

Tambe ta kontrolá si ta bin Hulanda Karibense ku un propósito legítimo, òf si ta kore riesgo ku e personanan ta resultá den trabou ilegal òf kriminalidat.

E kantidat di hende ku a nenga entrada, tabata kasi dòbel e kantidat ku a negna entrada na aña 2021, ora ku no a admití un total di 68 biahero ku a yega un di e islanan. 

Kondishon adishonal

KMar ta kontrolá tambe si ora un persona drenta e tin sufisiente medio finansiero pa sòru pa su propio mantenshon durante un estadia. Si akaso un persona no por proba esei, por mara kondishonnan na e atmishon, manera por ehèmpel un obligashon pa mèldu na Imigrashon di Kuerpo Polisial Hulanda Karibense (KPCN). 

Na 2022 a atmití un total di 256 pasahero bou di kondishonnan adishonal. Na aña 2021 tata trata di un total di 121 persona ku a wòrdu atmití bou di kondishonnan spesial.