ORANJESTAD – For di dia 7 di febrüari, 60 Militar di Ehérsito Real tin ehersisio na Aruba. E militarnan ta empleá na e unidat ‘107 Aerial Systems batterij’ na ’t Harde na Hulanda, i nan ta spesialisá den desplegá diferente tipo di ‘drone’. Pa hasi e ehersisio posibel, e militarnan tambe tin nan propio vehíkulonan i otro material militar disponibel.

E klima na Aruba ta brinda e militarnan bon posibilidat pa kumpli ku hopi oranan di buelo ku drone i ku esaki saka máksimo rendimentu for di e ehersisio. Na Hulanda e posibilidatnan ta mas limitá durante periodo di wenter. Banda di esei e ehersisio aki ta brinda e chèns pa kolaborá ku e koleganan di e Eskuadron di Marina Carib ‘Marine Squadron Carib’ i Wardakosta Region Karibe, ku ámbos tambe ta aktivo na Aruba.

E militarnan ta keda na Kazèrne di Marina Savaneta i ta aktivo na diferente lokalidat rònt e isla. Desde 15 di febrüari e promé vuelonan ta tuma lugá i e ehersisio ta dura te ku 24 di mart.

107 Aerial Systems batterij (107 ASBt)
107 ASBt ta un unidat di inteligensia operativo i ta spesialisá den despliegue di e sistema aéreo sin piloto (unmanned aerial system (UAS), mihó konosí komo ‘drone’. Ku e UAS aki e unidat ta rekompilá informashonnan ku otro unidatnan por usa  den nan despliegue operativo. E destakamentunan di UAS tambe por keda desplegá pa tareanan sivil. Durante e ehersisio na Aruba e ‘drone’ nan ta keda solamente desplegá pa propósitonan di ehersisio. E imágennan ku e drone nan ta traha durante e ehersisio no ta keda wardá.

Kolaborashon ku Luxemburgo i Bèlgika

107 ASBt ta kolaborá ku Ehérsito di Luxemburgo i Bèlgika. Durante e ehersisio aki tambe un kantidat di koleganan di Luxemburgo i Bèlgika ta bai rekohé eksperensia bou di guia di instruktornan di e 107 ASBt, bulando ku e drone nan Hulandes. E ehersisio ta separá for di e despliegue di e MQ-9 Reaper.