WILLEMSTAD – E aña aki atrobe polis ta bai aktua ku man duru kontra interupshon di órden públiko durante karnaval. Durante tur òptògt lo mantené un maneho di sero toleransha, segun Ministerio Públiko a bisa den un konferensia di prensa.

Kada persona for di 12 aña ku ta den besindario di e ruta di karnaval mester tin un sédula bálido huntu kuné. E but ku bo por haña si bo no tin’é huntu kubo ta 150 florin.

Registrá preventivo

A base di e Ordenansa di arma di fuego Ministerio Públiko a duna polis òrdu pa registrá preventivo lo kual lo ta bálido promé, durante i despues di òptògtnan di karnaval.

Esei ta nifiká ku polis lo por registrá pa arma di kandela si tin un sospecho rasonabel sin ku tin ainda un anterior sospecho presente.

Si un persona tin algu kuné ku por sirbi komo arma di kandela, e ta haña un but di 500 florin.

Tráfiko

KPC i Ministerio Públiko ta bai aktua duru den tráfiko, spesialmente pa shofùr i akompañante di vehíkulonan di motor riba dos wil manera motosikleta i skuter, pero tambe ‘quad’ i outo.

Pa vehíkulonan riba dos wil tantu e shofùr komo e akompañante mester tin un helm bistí ku ta sinta bon. Esun ku no kumpli, ta haña un but presentá di 300 florin.

No ta tolerá ponementu di ‘fever’, hòp i ‘drift’ ku outo, motosikleta, skuter òf otro vehíkulo. Den e kasonan ei ta sigui un but di 750 florin, ta konfiská e vehíkulo  i ta detené e shofùrnan. Molèster di zonido ta kosta 500 florin.

Shofùrnan di outo, skuter, motosikleta i ‘quad’ mester tin un karchi di kùr bálido, un karchi di impuesto, prueba di seguro i un reibeweis bálido. Pa kada infrakshon e sanshon ta 250 florin. Si bo no tin seguro e ta kostabo 300 florin.

Ta detené personanan ku no ta tene nan mes na e reglanan aki i ta konfiská e  vehíkulo konserní. Na warda di polis ta duna e persona embolbí un transakshon. Si bo paga e montante mésora bo ta haña un rebaho di 15%. Si bo kumpli ku e eksigensianan aki bo por bai buska e vehíkulo ku a konfiská for di 15 di mart.

Riba 24 di aprel 2023 a plania un huisio pa e personanan ku a haña un sitashon. Esnan ku skohe pa esaki tin chèns di haña un kastigu di prizòn, un but mas haltu i un antesedente penal.