KRALENDIJK – Dia 15 di mart 2023 personanan ku derecho di voto por bai vota pa elekshon di Konseho Insular i tambe pa Kolegio Elektoral. Importante ta pa sa kiko ta e diferensia entre e dos elekshonnan akí, e bentaha i nesesidat pa bai vota i tur loke komo votadó bo mester sa promé ku bo bai vota.

Di un banda tin pues elekshon pa Konseho Insular di Boneiru. Huntu ku Kolegio Ehekutivo nan ta forma gobièrnu di nos isla. Konseho Insular ta indiká kiko mester pasa na Boneiru i ta supervisá trabou di Kolegio Ehekutivo. Habitantenan di Boneiru ta skohe Konseho Insular. Esaki ta tuma lugá kada kuater aña. Pa medio di vota, huntu ku otro votadónan bo ta disidí kon konstelashon di nos Konseho Insular lo ta durante e próksimo kuater aña.

Di otro banda tin elekshon di Kolegio Elektoral tambe. E Kolegionan Elektoral ta konsistí di representantenan di pueblo pa e entidatnan públiko, ku huntu ku e miembronan di ‘Provinciale Staten’ i e miembronan di e Kolegio Elektoral pa votadónan hulandes den eksterior (kolegio elektoral pa no-residentenan) ta vota pa elekshon di Eerste Kamer. Ora ku bo vota pa e Kolegio Elektoral, bo tin influensia indirekto riba ken ta bai den Eerste Kamer i ku esei riba e desishonnan ku nan ta tuma eiden. I pues tambe influensia indirekto riba e desishonnan den Eerste Kamer ku tin di haber ku Boneiru.

Tur loke bo mester sa tokante e elekshonnan akí i informashonnan manera na unda, kon, ki dia i dikon vota, bo por haña riba e wèpsait www.boneirutavota.com 

Algun informashon importante:

Ki dia tin elekshon?

Elekshon ta dia 15 di mart 2023. Riba e dia akí bo por vota for di mitar di 8 di mainta te 9 or di anochi na kualke urna elektoral na Boneiru.

Ken tin mag di vota?

Bo tin mag di vota pa Konseho Insular si:

•              riba dia di elekshon bo tin 18 aña òf mas

•              riba 30 di yanüari 2023 bo ta residente di Entidat Públiko Boneiru

•              bo tin nashonalidat hulandes òf bo ta permanesiendo legalmente den Hulanda í promé ku 30 di yanüari 2023 bo tabata minimalmente sinku aña sin interupshon residente di Hulanda i tabata disponé di un pèrmit di estadia bálido

•              bo no ta ekskluí for di derecho di voto

            Bo tin mag di vota pa Kolegio Elektoral si:

•              bo tin nashonalidat hulandes

•              bo ta residente di Entidat Públiko Boneiru

•              riba dia di elekshon (15 di mart 2023) bo tin 18 aña òf mas

•              bo no ta ekskluí for di derecho di voto

Un residente ta un hende ku ta inskribí den Registrashon Básiko di Persona di e isla.

Kiko bo tin ku bai kuné pa vota?

Pa vota bo tin ku bai ku bo karchi di vota personal i un prueba di identidat. Esaki por ta un pasport hulandes, un sédula òf un reibeweis di Entidat Públiko Boneiru. Sin prueba di identidat bo no por vota.

Paga tinu! Riba dia di elekshon bo prueba di identidat tin mag di ta kaduká pa maksimalmente sinku aña i riba e dokumento na ‘bálido te ku’ mester tin 16 di mart 2018 òf un fecha despues di esei. Si esaki no ta e kaso, e ora ei pidi un prueba di identidat nobo na tempu na Registro Sivil. Tene kuenta sí ku e tempu di prosesamentu. Den kaso ku riba dia di elekshon bo deskubrí ku bo prueba di identidat a kaduká mas ku sinku aña, e ora ei lamentablemente bo no por vota.

Si bo tin derecho di voto pa elekshon di Kolegio Elektoral, bo ta risibí dos karchi di vota na kas. Un karchi di vota pa elekshon di Konseho Insular i un karchi di vota pa elekshon di Kolegio Elektoral. Bo ke vota pa tur dos elekshon? E ora ei bai ku tur dos karchi di vota na e urna elektoral.

Den siman di 1 di mart bo no a risibí karchi di vota ainda? Bo a pèrdè bo karchi di vota? Òf e karchi di vota a sker i pa e motibu ei no por lesa mas kiko tin riba dje? E ora ei pidi un nobo mas rápido posibel. Bo por hasi esaki por eskrito te ku djabièrnè 10 di mart òf personalmente te ku djamars 14 di mart 12:00 or. Pa hasi esaki bo tin ku bai Registro Sivil ku un prueba di identidat bálido. Den ámbos kaso bo tin ku bai tuma e karchi di vota remplasante personalmente na Registro Sivil, kaminda bo ta firma ku bo a hañ’é.

Kiko mi tin ku hasi si mi mes no por bai vota?

Bo mes no por bai vota, por ehèmpel pasobra bo ta malu òf temporalmente den eksterior? E ora ei bo tin mag di pidi un otro votadó pa vota pa bo. Esaki nan ta yama apoderá. Bo ta apoderá un hende solamente si di bèrdat bo mes no por bai vota. Tur kos tokante apoderashon ta menshoná riba e wèpsait.